「世界好现实。写得好唔好，可以由数据反映出嚟。你睇下我啲点击率——咁少！」

        「或者你试下写长篇。好多读者追开有条瘾，追追下就会变成追个作者本人。」

        「长篇唔系我强项……」

        「你试过写长篇未？」

        「中学嗰阵试过，不过无写完。跟住无试过……」

        「中学时做唔到，唔代表而家做唔到！」

        短短倾咗一阵，小花竟然三番四次讲中我心事，Ga0到我心郁郁，只手痕痕哋。当晚，我开始写人生中第二篇长篇。

        因为写得太投入，我返工时、放工之後都系写长篇，不知不觉荒废咗短篇，好多日无喺网上载。可惜写嘅过程好似人生咁，唔系努力就代表一定得，甚至乎写写下会突然唔知应该点样继续落去。即使预先准备晒故事大纲、人物设定、资料搜集，万事俱备，点知偏偏系欠东风，灵感话无就无。勉强跟住大纲去写，只会写到「形」，写唔到「髓」。

        我而家正正系遇到呢种情况，好耐都回复唔到。衰乜嘢？一定系我唔够料！如果系有料，我一早处理咗呢个情况，点会拖咁耐？安份守己写下短篇咪好罗，做咩要写长篇？面系人哋畀，架系自己丢，趁未有其他人发现，不如而家放弃……我好难过，连短篇都无心机写。唯一好彩嘅系现实生活中无人知道我放弃咗。

        无写之後，我啲时间松动好多。放工之後去行街买嘢，星期六、日疯狂煲剧或者做家务。生活多咗好多内容，但系呢啲内容又好似无乜意思。人生变到好无聊，返番去嗰个「唔知为乜」嘅状态。

        内容未完，下一页继续阅读